Un seugn fòra via

Sta neuit i l'heu fait un segn fòra via. A-i era la guèra, a l'avìa da esse la Prima, a vardé l'armamentari ch'i l'avìo adòss. Mi e Gioann (ant la vita i conòsso pa gnun ch'a-j ësmija, ma ant ël seugn a l'era mè amis) i scapavo andrinta a na ca drocà. An tiravo dapress.

I soma stërmasse an cròta, ma 'cò ambelelì a l'han trovane. La cròta a la dava ant s'na stansia anlagà. I soma ficasse su l'antigas e i soma campasse andrinta a l'eva e i soma andait sota. Gioann a l'é restà ancastrà con un pé ant na rèis e mi i l'heu molà 'l fusil për giuteje. A l'é restame gropà a còl con la coreja, ma an man i 'l l'avia pa pì. An col moment a son campasse andrinta 'cò doj ëd coj ch'an davo dapress. Armà, 'cò lor con l'antigas an facia.

I son rendume cont che mi i j'era bele che panà, che ora ch'i ciapèissa torna 'l fusil a l'avio fait an temp a fene sech antra doj. Ël temp a smijava ch'a l'andèissa al ralentator. Gioann a l'ha tiraje. I l'heu s-ciairà le bale 'd sò moschet ch'a fasio la stra 'd bole ant l'eva sombra. E peuj ël sangh ëd coj doj. Bele nèir. Tùit e doj mòrt.

I l'hai liberaje la gamba e i l'hai mostraje col dil che dzora a l'era ciàir. I l'oma nuà fin a rivé su. Fòra. I soma rivà che i chërdìa già 'd pa pì feila. A l'han tirane fòra. Mars e giassà, ma viv. I soma tirasse via l'antigas e Gioann, an tërmoland 'me na feuja, a l'ha vardame e a l'ha fame "Dijo Fauss". A ghignava, ma as ës-ciairava ch'a l'era mach ël nervos.

La sèira, an pais, la gent an vardava con j'euj sbërlusent. Dzortut le fije. Mi i lo capia ch'a l'era rispet, ma i j'era nen content franch tutun. Lor-lì a l'avio pa idèja ëd lòn ch'a fussa tiresse s-ciopatà sot a l'eva con n'antigas ant sla ghigna. Am ëvnisio an ment coj doj bonòm ch'a j'ero ëvnuit giù për fene sech, e a l'ero resta-ie lor. Për na frassion ëd second, mach na frassion ëd second e 'n colp ëd boneur (nòstr).

Doe fije, an passand-me tacà, a l'han sofiasse ant l'orija "Has-to vist? A l'é un ëd coj ëd la Marna". E an col moment-lì i son dësvijame. A l'avia rason mè grand. La guèra a l'é bruta.