lista rangià e varie ròbe

Bondì a tuti :)i l'oma avù chèich granëtta ant sla lista, che a fasìa dle ròbe dròle. Adess a smija tut a pòst. Chèich messagi a l'é përdusse da 'nt sël sit, ma a vardé ij registr ëd càrich e scàrich a smija che a domicilio a sia rivave sempe tut. Adess i vardo dë deje deuit al sit e gionté cole dontré ròbe ch'a l'ero përdusse për la stra.
Con l'ocasion i veuj saluté e ringrassié tute le person-e che i l'hai ancontrà a la Festa dël Piemont. Antant për ël piasì d'esse conosusse, e peuj për le tante bele paròle che i l'eve dime. I confesso che i son restà 'n pòch... coma dì? I son nen tant abituà ai compliment e i sper almanch d'avej nen fàit dle facie dròle :) Am fan motobin piasì, ma i veuj dive a tuti che chi fa le ròbe i seve vojàutri, nen mi. Antra tre ò quatr i podoma fesse 'l tombin për organisé sossì e solà, ma se peuj a-i ven gnun... quindi ij compliment e ij ringrassiament a van prima e dzortut a cole vàire mila person-e che a son ëvnùite a j'event ëd la Festa, peuj a le organissassion, a le companìe teatraj e ai sonador che tant a son dasse da fé e.. dzortut a Batista, ch'a l'é stàit l'ànima dla Festa për mèis e mèis, e che a l'ha fàit tut col gran travaj ch'as ës-ciàira nen, ma che s'a-i fussa nen col-lì... ciào festa.
Adess i scap a travajé, che i son anco' malciapà. Ma chërdive nen... as parla già dla Festa dël 2009 :))) E motobin prest i l'avroma da manca ëd volontari :)Bèrto