La snista dij perdent për vocassion

Da bogianen e volontari ampegnà an campagna eletoral për ël moviment a Sinch Ëstèile a venta ch'iv disa che lese l'artìcol ëd Novelli ansima al piemontèis a l'ha lassame bele che sburdì. Nen tant për la maréa dë stupidade ch'a l'é riessù a consentré an dontre righe, ma për la mancansa TOTAL d'anteligensa polìtica ch'a smon.

Che ij polìtich, tant a drita che a snista, a sio pijn ch'a verso 'd gent che 'd lenghe 'd minoransa a në capisso gnente i l'oma vist-lo tant sot al govern Prodi che sot al govern Berlusconi. Tuti e doj bin ampegnà a bocé qualsëssìa marca 'd legislassion a protession dle lenghe locaj. Donca a l'é pa lolì ch'a peul scandalisé.

A scandalisé a l'é che na përson-a ampegnà a fé campagna për un partì a sia bon-a a tireje ai sò na sapà ant sëj pé 'd proporsion bìbliche, e sòn pròpe ant un moment quand a decide tut a l'é nomach che na brancà 'd vot malcontà. A scandalisé a l'é la mancansa 'd professionalità polìtica, la mancansa dël mìnim sens ëd responsabilità anvers a la part che un a dis dë sosten-e.

Rasonom-je na minuta ansima. Tuti ij sondagi a diso che ij doj partì a son lì lì. Un 40% bon a voté a va nen d'autut, col 60% ch'a va a resta divis antra nojàutri (ch'i në ciaproma a truch e branca 'l 5%), e ij doj gròss, Lega e PD, ch'as në pijo 'n 47% a pr'un. Në 0,5% a decid tut, e anlora provoma a mostreje a parin Novelli a fesse ij cont an sacòcia, chissà mai che për le polìtiche a l'abia amprendù ij fondamentaj ëd l'aritmética djë scòle elementar.

Ël 60% malcontà ëd 4.4 milion ëd piemontèis a fa 2 milion e mes, dont lë 0.5% a son... 13.000 vot. Pa da scherseje tant ansima, che con na gavada da 10.000 vot j'elession it ses balat-je. Dròla, neh, ch'i debio esse nojàutri campagnin a mostreje a coj da bin ëd la Crosëtta a fesse ij cont an sacòcia? E pura parej a l'é, a la fin dla fera.

Vàire ch'a saran ij piemontèis ch'a pàiro a sua lenga assé da fesse monté 'l fot a lese le gavade 'd parin Novelli? Mach nojàutri ambelessì is foma anviron a 5000 përson-e al mèis, e as parla MACH d'ambelessì, sensa conté Facebook, e sensa conté la maréa 'd gent ch'a pàira a sò piemontèis, ma la Ragnà a la dòvra nen. Disoma ch'i sio antra 20.000 ambalinà?

E bòn, disomlo pura, stoma pa lì a fé tant j'erlo ch'a viagio a milionà gnanca nojàutri. Voroma 'cò dì ch'i sio 'd piemontèis tan-me j'àutri, e che donca 'cò nojàutri i restèisso an bìlich con le mideme përsentuaj d'orientament polìtich? Disomlo pura, ch'a l'é pen-a lògich. Fin a jèr ël piemontèis a l'era nen un dij gran soget ëd discussion dla campagna eletoral, e donca tuti i l'avìo fasse n'idèja 'd chi voté ò nen voté squasi 'd sigura con le mideme conclusion ëd tuti j'àutri, an proporsion.

E peuj, a quatr dì dal vot, a-i sàuta fòra col pì furb che tuti, ch'a ciapa ij piemontèis ch'a pàiro a sua lenga e a jë campa an brass a l'aversari dand-je fin-a dij picio për bon pèis (mai ch'i l'avèisso anco' pa capì che CHIEL a l'ha ciapane tuti an ghignon). L'é-lo balass-je tuti ij vot? Tuti tuti i chërdo pro nen, na part ëd gent ch'as buta 'l fassolet ant sla canapia e a lo vota franch tutun a-i sarà pro, për n'elementar question dë statìstica.

Mach darmagi che ij vot ch'as tramudo a valo dobi. Un gavà a la Bresso e butà a Còta coma diferensa antra lor a fa... doj. Torna aritmética dj'elementar, a 'n livel che un ch'a l'é stait sìndich ëd Turin as pensava pro ch'a dovèissa rivé a capì. Compliment. Për le polìtiche im sento dë sugerije da sautessne fòra a 4 dì dal vot a dì che la Juve a fa caghé, an finend sua gran tirada con un bel gobbi bastardi. Parej a l'é tranquil ch'a l'é balasse 'cò cole-lì, d'elession.

Le reassion dël PD? Ma gnun-e, as capiss. Tant Novelli, coma ch'a l'han dime, a conta tant 'me 'l doj da baston. É, PËR LOR a conta tan-me 'l doj da baston, ma lòn ch'a peul fess-ne sò aversari, dle gavade 'd parin Novelli, lolì vàire ch'a conta? Ah bin, ma tant lolì a l'é mach tuta teorìa. E anlora còs veus-to mai ch'i-j disa? Ch'as conto ij vot lùn-es ëd sèira, e as la vardo da bin, sua bela teorìa.

Però ch'as ciapo BIN VARDA për ij sinch agn dla pressidensa ch'a l'han daje a Còta an cadò, dë vnì peuj a pioré miseria ch'a l'han perdù për via che nojàutri ch'i votoma Sinch Ëstèile i l'oma nen daje 'l vot. Ch'as pijo bin varda, che pen-a ch'as preuvo i ciapo na còpia dl'artìcol ëd Novelli e i-j lo strofogno ant sla ghigna fin ch'a-i resta stampà.

I seve cola ch'a l'é la tragedia dla snista? A l'é che quand ël partì comunista a l'é finì, la mità dij comunista che n'elession a l'era bon a vins-la a l'é passà ant la Lega. E al PD a son restaje mach pì ij parin ëd la Crosëtta, che anco' adess a l'han pa capila che ij temp ëd la gran sità andustrial a son finì, le fàbriche a son sërà ò tramudà a lë strangé, e che a voté e governé a son le campagne e le valà.

La tragedia dla snista a l'é che a fé polìtica a son pròpi pì nen bon. Gnanca al livel elementar dë fesse ij cont an sacòcia. S'i veule feje oposission a la Lega a l'é mej ch'iv në fase na rason. An camp i-i soma mach pì nojàutri, e sòn iv lo diso NEN con piasì. Iv lo diso con gran s-giaj, përchè ant na situassion parej la democrassìa (pròpe coma concet) a l'é a arzigh dë sparì për da bon. E pa për via d'un colp dë stat, ma për un colp d'arterio.

S'a-i é cheidun dël PD ch'a veul repliché a l'é, as capiss, ël bin ëvnù. Gnun a l'é dapress a lincé gnun, e se sòn a servèissa almanch a mostreje torna a la snista a ten-se da cont sò vot (e fin a l'ùltima grampà, che tut a fa) a veul dì ch'a sarìa nen rivà mach për fé darmagi.