La Fera dël Lìber che a fa 21

a.m. [Albina Malerba?] dal Vënner ëd la Stampa dël 9 ëd magg dël 2008

A l’é la blèssa, la blëssa ch'a peul salvene, ël tema dla Fera antërnassional dël lìber ch'a fa 21 e che fin-a al 12 ëd magg a fa dël Lìngòt la pì granda librerìa d'Italia. La Fera a l’é 'dcó n'ocasion d'òr për andé a la sèrca d'editor an lenga piemontèisa coma Piemonte in Bancarella, La libreria Piemontese o la Bela Gigogin. Ij 21 ani 'd Fera a parlo almanch na frisa an lenga nòsta. Ancaminoma dal Pavljon 1: Stand E 46 Viglongo, l'editor ëd Costa, Brofferio, Isler, dij romans an piemontèis e dla Gramatica 'd Griva; Stand E 55, Neos Edizioni 'd Rivoli ch'a pùblica racont për ij cit an piemontèis, le poesìe dë Siolòt, le «Conte e pitanse» 'd Vittoria Minetti; a lë Stand E 50, Graphot, con ij lìber ëd Borgh Vanchjja 'd Ferraris, le «Canson dla Piòla» 'd Piergiorgio e Roberto Balocco, con partiture mùsicaj e cd; a l'A 18-B19 Alzani, con ij lìber an piemontèis për le masnà. Passand al Pavjjon 2, a F 45 la Daniela Piazza, con ël Dissionari Gribaud e le poesìe an piemontèis ëd Giovanni Arpino, e, novità, «Lassù i primi» di Augusto Grandi. Sempe al Pavijon 2 Stand KOI la Ca dë Studi Piemontèis, dova as treuvo la «Gramatica» an piemontèis dël Pipino; ‘l lìber për le scòle e për ij cit «Prima Mignin», compagnà da un cd; la stòria dla Leteratura piemontèisa 'd Gianrenzo Clivio e ‘l mèj ch'as treuva 'd coltura dël Piemont; dàusin lë Stand KOS l'Artìstica Editrice, l'editor dël Vocabolari Sant'Albin e dla Gramatica 'd Brero; al K 52 i trovoma la Priuli e Verlucca con tanti bej lìber sël Piemont, e ij volum dl'Atlante Linguistico e Etnografico dël Piemonte Occidentale. Al Pavijon 3 segnaloma lë Stand S 37, Il Punto-Piemonte in Bancarella, 'dcò con j'euvre dla Ca dë Studi Pinin Pacòt, ‘l mensil «Piemontèis Ancheuj», ‘l Vocabolari ëd Brero; a lë Stand R 71, Interlinea 'd Noara, ch'a l'ha le poesìe an piemontèis 'd Remigio Bertolino e 'd Bianca Dorato e cole italian e piemontèis ëd Beppe Mariano.