Cheidun conòss-lo un ni piemontòfon?

Cerea Borichèt, tanci bej auguri.
Mi ed masnà e n'ho quatr e d'asilu e j'uma na bun-a esperiensa, ma un u r'è
già furtinà se u treuva der maestre ch'i parlu nen mal der piemuntais.
Mi e sper ch'i treuvi na maestra "piemuntaisa", ent 'r mentre fé en manera
ed mai mes-cè, chi u parla piemuntais, ch'u parla sempe piemuntais e ch'i u
parla italian ch'u parla sempe italian.
Feje vughi liber en piemuntais e che co a ra televisiun caicadun u parla
piemuntais.
U r'è fatiga, ma parleje, parleje, parleje e sperè che 'r piemuntais u-j
piasa.

Giacomo Giamello

----- Original Message -----
From: "Borichèt"
To:
Sent: Tuesday, January 29, 2008 8:17 PM
Subject: [piemont] Cheidun conòss-lo un ni piemontòfon?

Cerea a tuti!
A l'é la prima vira ch'i scrivo an sa lista, i l'avrìa da manca 'd
n'anformassion.

L'istà ch'a-i ven, a-i nassrà n'àutr cit bogianen. Gnente 'd foravìa,
sigura, e coma a l'é mach normal i l'oma decidù ëd felo chërse
bilengh, an parlandje piemontèis.
A l'han ëdcò dime che për la scòla dl'anfansia a venta dësvijesse
prest e s'un a veul mandelo al ni, na vira ch'a l'abia n'ann o giù da
lì, a venta bogesse già da adess. Dagià che le struture lenghìstiche a
ancamin-o a formesse pròpe vers col'età-lì e che na lenga parlà mach
antëcà a arziga dë dventé la lenga dla serva, am piasrìa troveje un ni
anté che le magistre a-j parlo piemontèis. Mach che ant ij dontré pòst
anté ch'i l'hai ciamà a l'han dime che lor «a l'han nen costa
possibilità».
Adess mi i vorërìa savèj: i-é-lo cheidun ch'a conòssa un ni anté
ch'a-i sia almanch chèich magistra ch'a l'abia la bon-a volontà (e la
conossensa) për parlé piemontèis a le masnà dont ij sò a ciamo ës
servissi?
A sarìa ancor mej si ambelelì a-i fusso 'dcò d'àutri cit piemontòfon,
parèj a chërsërìo ansema, an rendend-se cont d'esse part legìtima (e
tut afàit normal) ant un mond a tanti color.
La zòna pì còmoda a sarìa ël canavèis, ma dësnò i vëdroma d'organisesse.

Mersì a tuti coj ch'a podran deme chèich notissia.

Borichèt