Óndes agn ëd cors ëd piemontèis

g.t. [Giovanni Tesio?] dal Vënner ëd La Stampa dël
22 ëd fërvé dël 2008
 
A fa óndes. Des pì un che la Ca dë Studi Piemontèis
a organisa për cont ëd la Region Piemont (Assessorà a la Coltura) ij cors «Il
piemontese. Gli scrittori, le opere, i luoghi, le parole» (diretor dij cors
Albina Malerba, coordinament Davide Damilano e Giulia Pennaroli) . La scomëssa a
l’é nen mach ëd ten-e da cont lòn ch'an ven da na richëssa che tròp soens a l’é
'ncora considerà da gnente o da pòch ma 'dcò 'd dimostré che scrive 'n
piemontèis a l’é nen impossìbil o mal fé. Tut àutr. Tersa, ma nen ultima rason,
cola 'd corisponde a la lege regional dël 10 d'avril 1990 (la lege 26 e
modifiche), nà për la tùa, la valorisassion e la promossion dl'original
patrimòni lenghìstich dël Piemont. Sinch mila iscrit an des agn d'atività a
dimostro che la veuja 'd chërde a cheicòs ch'a va pì 'n là 'd lòn ch'a smija a
prima vista a l’é nen pòca. Lòn ch'a cissa a continué. Nen mach. Lòn ch'a cissa
a 'nventesse 'd còse neuve. Tant për dì, ij cors a son aumentà 'd nùmer:
vintetré spatarà 'nt ij capleu dla provincia e 'n tanti d'àutri pòst ch'a son
Aich, Ivreja, Moncalé, Pinareul, Salusse, Varal, Bra, Carmagnòla, Cavalion,
Siriè, Savian, Susa e da st' agn sì Civass, Nèive, Castlinaud e Prioca. Duvert a
tuti e completament a gratis, a son cors fàit d'eut lession ëd doe ore pr'un,
con na tranten-a 'd professor angagià (da Giuliano Gasca Queirazza a Tavo Burat,
da Massimo Scaglione a Gianfranco Gribàud, da Censin Pich a Sergio Gilardino, da
Enzo Vacca a Gianni Davico, e tanti d'àutri) për mostré a scrive, lese, parlé 'l
piemontèis, a conòsse la lenga, la literatura, la mùsica piemontèisa. Le lession
a ancamin-o sman-a ch'a-i ven a Cone (28 ëd fervè). A Turin a ancamin-o 'l 3 'd
mars (la neuva sede a l’é la Biblioteca Cìvica 'd Villa Amoretti, an cors
Orbassan, da sinch a set ore). Për iscrivse a basta telefoné a la Ca dë Studi
Piemontèis (011/ 53.74.86; o scrive a info@studipiemontesi.it) opurament
presentesse a le lession e fesse scrive lì.
 
 
 
P.S.: compliment al "nòst" Gianni
Davico