Un rabel dla forca

Vàire gent a sarà 'ncorsusse che la testà dla wiki piemontèisa ant j'ùltim mèis a l'é stàita pitòst balarin-a, e pì 'd soèns che nò... d'autut fòla. A-i passa nen dì ch'a-i sia nen un messagi neuv, mes an piemontèis, mes an anglèis e mes n'italian, e tuti sti messagi se un a la la passiensa dë les-je a l'han squasi gnun sust. La question, belavans, a l'é mach na question d'organisassion malfàita, disorganisassion che però gnun ëd nojàutri dla comun-a piemontèisa a peul nen arzòlve.

Quand che la matin dël prim dì dl'ann i son torna trovame 'n messagi tut virà dzorsota i savìa pì nen andoa gireme, e s'a fussa nen rivame 'n boletin postal NEN ufissial fàit da gent ëd la wiki anglèisa i l'avrìa mai pì savù andoa trové la roba da pronté. E già, përchè miraco vojàutri i pense che na fondassion antërnassional dl'amzura dël WMF a sia motobin organisà e a l'abia 'n pòst andoa ch'a-i é 'n programa dij travaj e as dis lòn ch'a-i riva... Brav ciola :) Ës pòst për ess-ie a-i é pro. As ciama "andoa a càpita". Sta vira la loterìa a l'era dë trové j'istrussion ant le ciaciarade 'd n'utent dla fondassion wikimedia...

Se i pense ch'a sìo girame na frisa, i l'eve nomach che tacaje an pijn.

Va bòn, còs veus-to mai fe-ie? Mi i son ciapame sù mia piuma (as fa për dì) e i l'hai scrivuje a la lista postal antërnassional a dije ch'a son na banda 'd ciola. E përchè. Ij përchè a son motobin sempi, lòn ch'a l'ha gnun sust a l'é che:

1. an fan viré mila volte le mideme frasi (che për tant che a giro e a tóiro a son sempe le mideme)
2. për un pùblich europengh nojàutri i viroma an piemontèis tuta la lege dl'esension fiscal american-a. Gavà ch'a sia mach travaj campà via, a la fin dle fin un piemontèis ch'a lesa lòn peul-lo pensé?? Un normal a pensa ch'a sia na ròba mach për american, e che chiel a-i intra nen.
3. crëppa se na vira ch'a l'é na vira cheidun at dis fussa mach che na minuta prima ch'a l'han ël but dë cambiete chèich-cos ansima a l'edission ch'it soagne. Cris-cia-là, i soma ant ël sécol ch'a fa XXI, a l'é chèich dì ch'a l'han anventà na ròba ch'as ciama pòsta eletrònica... é... figur-te...

Mi ch'i son sempe fòl 'mè na mica i l'hai fàit tut mè brav rabel ëd protesta ma antant ij messagi neuv i l'hai prontaje. A son registrà ambelessì

• http://pms.wikipedia.org/wiki/Wikipedia:Donate-thanks/pms
• http://pms.wikipedia.org/wiki/Wikipedia:Donate-options/pms
• http://pms.wikipedia.org/wiki/Wikipedia:Donate/pms

e nò, andoa ch'a fusso i l'hai nen dijlo a gnun, ch'as jë sërco. E diav-là, i travajoma tuti a gràtis, ma na frisa 'd rispet për sò travaj am ësmija che un a peula 'cò ciamela. L'arspòsta a l'é stàita la sòlita. Cheidun a l'ha pijala coma na question personal, coma se mi la matin dël prim dì dl'ann im aussèissa mach për feje dle question a chiel, e an dzorapì... i son sentume dì ciàir e net che a-i n'anfà pa se l'ùnica version ch'a la riva a l'é cola anglèisa. 

Anlora... mi i veuj nen dì che smon-e për la stra ij 5 euro ëd finansiament che (bin ch'a vada) ël pùblich piemontèis a peul dé a sia na gran tragedia. La question a l'é nen cola. La question a l'é 'd rispet. S'a chërdo nen che nojàutri i-j servoma a chèich-còs, anlora codì ch'an pianto soa reclam ansima a nòstre pàgine? É-lo nen mej ciamene dë buté la reclam ëd google e ten-se lòn ch'a në ven, sensa fene core mè dj'aso a fé mila tradussion ëd regolament american ch'a servo a 'n tubo 'd gnente?

Ma ansoma, na vira ch'i l'hai capì che tant is parlavo antra sord i son ëstam-ne cito. Tant... Ancheuj però i l'avìa gnanca fàit an temp a pensé se deje ij messagi franch l'istess ò scanceleje, che... ël messagi a l'é torna n'àutr. E torna sensa che gnun a-j disèissa nì crëppa, nì s-ciòpa a gnun. E anlora basta. Tant a l'é motobin ciàir che l'andi cost a l'é e cost a resta. Da 's moment-sì mi a la fondassion i-j fom pì nen gnun servissi 'd tradussion. Scuseme tuti, ma i l'hai pì nen gnun-a veuja dë felo, ch'i l'hai un travaj, na famija e dle vire fin-a dj'amis ch'am fa piasì trovesse, ant sël pat dë core për ij mond virtuaj. S'a-i é cheidun ch'a l'ha veuja dë pijé mè pòst, ch'am fasa savej, ch'i-j giuto a pijé l'andi col travaj.

I resto ant la wiki piemontèisa coma aministrator e utent, che nojàutri i saroma miraco mach antra quatr gat, ma i soma gent che ant sël travaj a jë spuva nen ansima. Belavans coj ch'a son costumà a trovesse sot al dadré vàire mila s-ciav ch'a coro a gràtis ëd sossì a son dësmentiass-ne da vàire.  Però se la fondassion a l'amprend nen a buté la gent an condission dë fé sò travaj lë vnì a 'l l'ha motobin curt. Lòn mi im preuvo pì nen a spieghejlo a gnun dj'american, an bel moment a vnirà ch'a lo capiran daspërlor, mach che a sarà peuj tard...Comsëssìa... cole-lì a son pì nen facende mie