Nùmer Zero

=========================
Bon-a Fin e Bon Prinsipi!
=========================
Ël cadò pì bel ch'a sia rivane a nojàutri a l'é la quantità 'd tràfich: mach ant la prima sman-a i l'oma servù na media 'd 1000 pàgine al dì, dont 250 a letor piemontèis. E as trata nen mach ëd tràfich passiv. La gent pianin pianòt a taca a ciamé e as sento le prime vos, le prime penelà d'un quàder che viaman a vnirà sempe pì largh, a mostrene la blëssa e la varietà dle mila parlà piemontèise. Dë mnestra i l'oma pro da mangene anco' tanta, ma l'andi a l'é 'd coj bon. Donca lassene dì mersì 'd cheur a tuti e dësmentieve nen dë ciamé lë 011.198.34.213 për dì la vòstra :)

Ant ës nùmer-sì:
* La wiki piemontèisa dzora le 12.000 vos!
* Liste postaj an piemontèis
* Ij fumét "nèir" an piemontèis
* Lìber për chi a-j pias lese e për chi a lese a l'é nen bon

La wiki piemontèisa dzora le 12.000 vos!
========================================
Anandiasse squasi për rije dij 27 ëd Mars dël 2006, apress a n'ani e mess ëd travaj dij volontari la wiki piemontèisa a l'é giumaj na realtà editorial ëd tut rispet. Dl'otóber 2007 a l'ha passà 'l milion ëd paròle publicà e al dì d'ancheuj a la cheuj pì che 12.000 vos. A l'é soagnà da na strutura aministrativa ëd 5 person-e e da na base d'utent ch'a continua a monté 'd nùmer e a slarghesse 'd proveniensa geogràfica.

Miraco la prima e pì bela euvra portà a bonfin da la wiki a l'é stàita la publicassion sistemàtica d'un catàlogh dij topònim piemontèis, ch'a l'ha anco' da manca ëd tant travaj për le frassion ma a l'é squasi completa për lòn ch'a toca ij borgh (http://pms.wikipedia.org/wiki/Categor%C3%ACa:Borgh_e_sit%C3%A0_d%C3%ABl_... ).

Ant lë vnì la sfida pì gròssa a sarà 'd sigura cola dël censiment dij topònim idrogràfich e dël riliev. Për tante cite dòire e bialere piemontèise costa-sì a podrìa esse l'ùltima ocasion dë buté a la sosta sò nòm, anans ch'al dësparissa. E midem a val për bòsch e brich. Donca tuti a son anvità a campé 'ndrinta ij nòm ëd tòch e tochèt ëd teritòri ch'a san, a-i n'anfà nen se coma grafìa a scrivo mach a truch e branca, che peuj a deje deuit a-i pensa la strutura editorial.

Liste postaj an piemontèis
============================
Dapress a vàire ani 'd sagrin con ij caràter balarin ch'a seurto fòra ën dovrand le liste ëd google e yahoo, a la fin dle fin la fondassion Vox Humanitatis (http://www.voxhumanitatis.org ) a l'ha butà sù na strutura pùblica ch'a travaja con lë stàndard UTF-8, visadì ch'a da nen për scontà che la gent a scrivo për fòrsa n'anglèis.

Ij prim esperiment ansima a i-iter a l'han dàit n'ésit positiv, coj messagi postaj organisà për ciaciarade a soget, an manera che chi a veul lese as treuva a podej gestì tut l'ambaradan técnich an piemontèis e ch'a sia belfé ten-e 'l fil ëd lòn ch'as dis ansima a chèich-còs. L'esempi sperimental as ës-ciàira a l'adrëssa http://pms.i-iter.org/forum/4

Ël servissi a l'é duvèrt për tuti, associassion e mojen d'anformassion comprèis. Ël but d'i-iter a l'é col dë giuteje a tuti coj ch'a travajo ant sël piemontèis ën smonend ëd servissi a gràtis e 'd tecnologìe pronte da dovré, an manera che la gent a peula travajé da tranquila sensa dovej sagrinesse a arzolve 'd gàbole dla Ragnà.

Ën butand ansema ant na vitrin-a sola vàire associassion, mojen d'anformassion e atività 'd tute le tendense, i foma conòsse tuti a 'n pùblich slargà, an manera che letor e ascoltator a debio pì nen sgaté sot ai tapiss për ëvnì a conòsse l'oferta editorial e d'atività an piemontèis.

Chi ch'a veul deurb-se na lista postal an piemontèis ò 'n boletin parej ëd cost a peul felo ën fasend domanda da 'nt l'anliura "Redassion" http://pms.i-iter.org/contact

Ij fumét "nèir" an piemontèis
==========================================
As ciama New York City 2123 e a l'è stàit un dij "cas" dël dissègn ëd fantassiensa dël 2005. Na stòria 'd vite sbandà an brova a la lege, dissegnà an bianch e nèir con chèich cita spluva 'd color. Se M.sù Gramegna a fussa vivù al dì d'ancheuj sòn a l'é lòn ch'a l'avrìa contà, donca nen mach n'amportassion american-a, ma 'n filon bon dël gust dël pùblich piemontèis atualisà ant le fòrme 'd comunicassion dël sécol ch'a fa XXI.

La version piemontèisa dla prima serie a l'é bele pronta e a sarà publicà anvers a la fin ëd Gené ansima a i-iter, na vira ch'i sio gavasse j'ùltime gàbole técniche. Un cit antipast as peul vëdd-se a l'adrëssa http://pms.i-iter.org/content/nyc2123 fene savej s'as ës-ciàira e as les ant na manera decenta, ch'i soma dapress a prové vàire solussion për avej un bianch e nèir normal ansima a tuti jë scherm.

La produssion ëd fumèt ch'a dan ël përmess dë fé version an àutre lenghe a l'é antramentr ch'a monta, dzortut për via che ij gròss giornaj american a son dapress a licensié motobin tant dissegnator, e ij dissegnator a 'ncamin-o a capì che prima ròba për vende a l'é fesse conòsse. E nojàutri i në profiteroma për smon-e sempe pì 'd ròbe bon-e al pùblich.

Lìber për chi a-j pias lese e për chi a lese a l'é nen bon
=============================================================
Organisà an doe session: lìber ëscrit e lìber parlà, a l'é dorbusse la biblioteca d'i-iter. Le version parlà a comprendo tuti ij messagi a vos e col temp a l'avran ëdcò dij tòch ëd mùsica e teatro, cole scrivùe as deurbo con la prima part dla version an piemontèis dël Milion ëd March Pòlo. L'adrëssa për la'cess a la biblioteca a l'é http://pms.i-iter.org/book

Ël Milion a l'é un test motobin amportant për la stòria piemontèisa, dzortut përché a parla dl'orient dij temp che l'orient a l'é intrà 'd prepotensa ant j'anteressi dël comun d'Ast e dij Savòja. Donca na fotografìa motobin anteressanta dla manera 'd pensé e dël comersi d'antlora e na letura ch'a fa piasì për l'andi da conta che 'l lìber a smon.