Italia: ij senator a protesto che a l’han pa ël gelato

Doj senator italian, Rocco Buttiglione (UDC) e Albertina Soliani (L'Ulivo), a nòm ëd vàire àotri sò colega l’8 ëd Giugn passà a l’han mandà na domanda a ij questor dël Senat për fé che la buvèt dël Senat dla Repùblica a l’abia ëdcò ‘l gelato.

Soa somanda a l’è motobin ciàira e sempia, testual «Iv foma domanda d’avej un miliorament dla qualità dla vita an Senat. La buvèt a l’ha pa ël gelato. Nojàotri i pensoma ch’a sarìa util ch’a ‘l l’avèissa e con sòn i soma sigur che an vàire a la penso tan-me nojàotri. Peul-lo provëdd-se? As traterìa d’adegué ij servissi dël Senat a j’esigense dla vita ëd tuti ij dì dle persone. Ën spitand vòstra arspòsta iv ësmonoma un cordial salut.»

Ij senator-questor ch’a dovran decide se aceté ò bocé sta domanda (e se acetela, coma) a son Gianni Nieddu (L'Ulivo), Romano Comincioli (Forza Italia) e Helga Thaler Ausserhofer (Südtiroler Volkspartei).

Già a la mità ‘d mars ël president dël Senat, Franco Marini, a l’avìa daje a ij senator ël përmess dë dovré la sala dj’at parlamentar per ël prim cors da sommelier për senator, antramentr che a Montecitorio (sede dla Ciambrèa dij Deputà) a-i ero dapress ch'as discutìa ëd prodot agrìcoj a qualità certificà. Për gionta ij senator a l’avìo peuj ciamà e avù djë "sman-e" dedicà a le galuperìe tìpiche prima ëd vira region e peuj ëd vira provinsa.

Sorgiss: http://it.wikinews.org/wiki/Italia:_protesta_al_Senato_per_avere_il_gelato