Ij nùmer dle wiki cite

Con sossì i anandioma l'osservateuri ansima a le wiki cite. Ël camp d'osservassion a l'é anco' motobin an provisòria, che pr'esempi an manca l'equivalent dij dat ISTAT për la Savòja e donca pr'adess i-i la foma pa a include la Val d'Osta e l'Arpitan (ò le valà ossitan-e) ant ël cont. As feuj-sì a l'é nait coma utiss për la gestion dla campagna ëd reclam dla wikipedia piemontèisa, e belavans për j'aotre lenghe cite i l'oma nen l'equivalent dl'arsërca faita a sò temp ansima al livel d'alfabetisassion an piemontèis. Donca i soma obligà a ten-e bon nòstr 2% d'alfabetisassion për tuti, ën sperand che ij gestor dle wiki ant j'àotre lenghe a riesso ampressa a trové dij dat nen mach estrapolà da ‘nt ij nòstr. Prim coment a l'é col che le wiki cite a smon-o tute un fator ëd penetrassion ant sò mërcà motobin pì àot che nen col dla wikipedia an lenga dë stat. Sòn a ven da vàire fator:

1. la sitoassion ëd monopòli (an italian a-i é vàire da sërne, an nòstre lenghe i-i soma mach nojàotri)
2. la pì gran «militansa» dij sìrcoj ch'a soagno le lenghe locaj, nen ant un sens polìtich, ma cultural.

Ij dat a son ësmonù coma rafront al dat nassional, visadì «vàire vire» ël dat nassional i l'oma fait e a saran agiornà con frequensa mensil.