FreeCol an Piemontèis

Sta categorìa-sì a l'è dedicà al prim videogieugh an piemontèis: Freecol. As trata dla simulassion dël process ëstòrich ch'a l'ha mnà a l'andipendensa dle colònie merican-e. Për vinse na partìa i l'eve nen mach da savej fé la guèra, ma dzortut da esse dij bon aministrator pùblich e dij polìtich coj barbis. As peul gioghesse antra vàire person-e ant sla Ragnà (minca un con soa lenga nativa) ò pura un a peul gieughe daspërchiel a ca soa.

Për gieughe, dëscarieve na version qualsëssìa a parte da 'nt la 0.7.0, ch'a resta la prima localisà an piemontèis. Për dovrelo i l'eve da manca d'avej Java anstalà, ma lolì al dì d'ancheuj a dovrìa ess-ie ansima a tute le màchine.

Për sërne dë travajé an piemontèis: na vira ch'i l'eve anstalà ël gieugh, felo parte. Chiel a part n'anglèis, vojàotri sërnive Options e selessioné coma lenga PMS (piemontèis). Deje l'OK, saré 'l gieugh e torné a deurblo. Voalà, vòstr gieugh a parla la lenga ëd Giandoja :)

Për fé pràtica: sërnì dë giueghe daspërvojàotri, peuj ant j'opsion dël gieugh buteve un capital ëd partensa ëd 50.000 lire. Nen che lolì a basta për vinse, ma antant quand che un a-i pija l'andi a gieughe avej dij sòld an sacòcia a giuta sempe.

Për fela curta: as trata dë fondé dij borgh ant le colònie, fé melia, gavé mineraj e argent, fabrichesse j'utiss e (as capiss) sërché d'avej chèich-còs che un a peul mandé al pòrt dla Capital për vendlo e vagné 'd sòld. Antramentr che vojàotri i travaje 'me 'd mòro, ël goèrn a tira drit a aosseve j'ampòste. I peule arfudeve dë pagheje, mach che la Coron-a a peul feve boicotagi ëd vòstra mercansìa. Anlora vojàotri i peule fé comersi con j'indian e j'àotre colònie europenghe, mach che ël Rè as anrabia e a peul mandeve ij soldà a rangeve për le feste... ansoma, tut com a l'é stait ant la vita.

Arsèive le neuve dël sìrcol: as peul. A basta mach deurbse un cont ansima ës sit-sì e butesse sòcio dël sìrcol FreeCol an Piemontèis. Le neuve av rivran për pòsta eletrònica, sempe ch'i l'abie sërnù dë fev-je mandé ant ël process d'iscrission.

Precisassion për j'Ultras ëd Curva Montecitòrio: për coj ch'a chërdo che tut ël mond a l'abia mach maitas dë congiuré contra l'elmo dë Sipio e Roma, e che ës gieugh-sì a vada a arzigh d'anfleje soa Sacra Imàgin dla Patria Litòria, ch'a l'é Un-a, Andivisibil, Bela 'me la Madòna e giù rumenta fassista fin ch'a-i n'a-i é... I l'eve da savej che:

• ël gieugh a lo fan a lë strangé, andova che a l'é belfé che l'Italia a sapio gnanca andova ch'a la resta ant sle carte geogràfiche,
• j'American quand a l'han fait soa Crija dl'Andipendensa ëd Bòssi a në savìo gnanch na frisa, ch'a l'era anco' pa na-ie gnanca 'l pari 'd sò cé,
• L'ùnica arcesta che për adess i soma antramentr ch'i foma a chi ch'a dësvlupa ël gieugh a l'é che da già che j'Europengh a peulo mandeje ij Gesuìta a j'Indian për feje Cristian, anlora che j'Indian ch'a peulo mandeje djë Siaman a convertì j'Europengh e feje vnì Pagan, për pari oportunità antra giogador,
• pёr ёschёrs carògna d'un destin maloros chi ch'a l'ha virà ës gieugh-sì an piemontèis... a l'é dë snista, che pì dë snista as peul pa :) S'a-i rivèissa mai un referendum për l'Andipendensa mi i voterìa contra, però a-i é na ròba ch'as ciama Libertà d'Opinion, e n'aotra ch'as ciama Drit a l'Aotodeterminassion e a l'é nen fasend j'istérich ch'as fa polìtica.

Sòn a farìa pa gnun-a manca dë dilo ant un pais ch'a fussa pen-a normal, ma da già che n'Italia la mama dj'istérich a la cata na masnà minca doe minute... mej fé che dilo ciàir e net ;)