FreeCol: ël prim videogieugh an piemontèis

Betawiki a l’é `l sit andova ch’as fa la pì part dël viragi dël programa mediawiki (col dla wikipedia). A l’é nà dzortut për gestì ël programa mediawiki, ma ant j’ùltim temp an vàire a lo vëddo coma na bon-a arsorsa për dj’àotri proget a Sorgiss Duvèrta. A la fin dle fin sòn a l’ha mnà a gestì ant sël midem sit ëdcò la localisassion d’un clon a gràtis dël gieugh Colonization ciamà Freecol.

Coma efet colateral, ij localisator ch’a travajo a pronté le version locaj ëd mediawiki adess a peulo ëdcò pronté na version ënt soe lenghe d’un videogieugh, e sòn con le mideme tecnologìe ch’a l’han già fa-ie la man a dovré.

La prima version ëd Freecol con andrinta na lenga regional europenga a l’é la 0.7.0 e coma prima localisassion a-i é cola an piemontèis. A l’é belfé ch’a-i ven-o dapress vàire àotre localisassion “minor”, butand ën consideran che ij videogieugh a resto n’arsorsa për ëspantié l'alfabetissation an lenghe regionaj antra ij giovo.

Freecol a l’é na simulassion dël process ëstòrich ch’a l’ha mnà a la Crija dl’Andipendensa da part dle colònie anglèise ant la Mérica dël Nòrd, e ij giogador a l’han da fé vàire travaj ch’a l’han natura polìtica e aministrativa (ant sël pat d’andé a finì dë feje la guèra a la Coron-a).

A sente ij localisator piemontèis, però, ël gieugh a l’é pa stait sërnù për com a l’é fait. A l’é mach ch’a l’era ant sël pì bel ëd Roma, pront për esse virà, bele che gnun a savèissa che rassa ëd gieugh ch’a fussa. J’argoment “andova” (betawiki) e “coma” (mediawiki stàndard) a son stait decisiv për ambarchesse ant ël travaj.