Còs é-lo n'antifassista?

Bondì a tuti!

I l'hai lesù la pàgina 'd discussion ansima a la question dla categorisassion ëd Norbèrt Bòbio coma "antifassista" (http://pms.wikipedia.org/wiki/Discussion:Norberto_Bobbio ).

Am ësmija ch'a sia dura s'is butoma a consideré le posission polìtiche coma fissà a vita. I chërdo che Bòbio a sia stàit un fassista a l'eva 'd reuse (coma squasi tuti col dj'agn X ëd l'era fassista) fin ch'a l'é nen anandiasse l'Arzistensa, e che PEUJ a sia passà a fé l'antifassista.

An vàire, tan-me mè grand, për tant ch'a combatèisso contra ij fassista lor antifassista a son mai ciamasse. S'it-j ciamave a chiel at disìa "ël Rè a l'ha ordinà..." e fa ch'it n'abie. Për chiel a l'era na question ëd fedeltà a la Coron-a, peuj ch'a fasèissa l'autista për Antoniceli lòn a l'era 'n piasì, che la person-a a-j piasìa, ma soa rason për combate a l'era 'l Rè.

Che ij fassista a tochèisso j'ebréo a-j dava ant sna bala përchè nòstra famija a l'ha sempe avù dij bon rapòrt con na famija dë sgnor ebréo, e chiel a-j andava nen giù che "ij cagnass dël Duce" (com a jë ciamava chiel) a-j dèisso fastidi a la gent da bin. I chërdo ch'a sio stàit an vàire che 'n bel moment a sio arvirasse contra 'l Duce pa tant për dle question polìtiche, ma pitòst për via dël "disdeuit" dij fassista e dj'órdin dël Rè.

I chërdo che a buté tuti ant na burnìa sola as fasa mach confusion. A mi am piasrìa na categorìa general "antifassista", ch'a ten-a andrinta tuti coj che ant na manera ò 'nt l'àutra a son stàit "contra" 'l fassism, però peuj i farìa na sot-categorìa "Arzistensa" për definì lòn ch'a l'é riva-ie sot a la RSI, e ambelelì andrinta i farìa dle categorìe për ten-e separà le vàire component sìngole dël CLN.

As trata ëd vàire fòrse ch'a l'avìo 'l midem but militar imedià ma dij but polìtich (e dle sorgiss d'arforniment) motobin diferent. I treuv dur buté Sogno e ij Garibaldin dla Valsusa ant la midema tòla. L'istess a ventrìa për mè cont fé col fassism, che buté Pavolini e Ciano ant la midema supa am ësmijerìa tan-me buté ansema Trotzkij e Brezhnev. Comunista a j'ero pro tut e doj, ma l'equassion lì as anandia e lì a la finiss.

A l'é pro vèira che ant n'enciclopedìa as peul nen (e as DEV nen) dé 'd giudissi ansima a le part d'un prosess stòrich, ma almanch provesse a fene na catalogassion ciàira ch'a-j fasa da fondament a l'anàlisi stòrica i chërdo ch'i dovrìo felo.

A fé parej M.sù Bòbio a podrìa esse catalogà coma "fassista dal '39 al '41", "académich ch'a l'han fàit cariera sot a le lege rassiaj", "antifassista dël 1942-45", "personalità dël Partì d'Assion".

La vita 'd na person-a a l'ha sempe vàire part, nojàutri i dovoma nen nì fé dj'eròj, nì fé 'd danà. I l'oma mach da buté dj'anformassion an fila.