015 - Ambelessì as conta dla provinsa 'd Turcomania

Ant la Turcomania a-i é tre sòrt ëd gent. Na sòrt a son ij turcoman, che a adòro Maomèt, a son ëd gent sempia e a parlo ant na lenga ch'a fa scheur, as në stan për montagne e valà e a vivo 'd soe bes-ce, a l'han ëd cavaj e 'd muj grand e motobin vajant.

E j'àutri a son dj'armen e 'd grech, ch'a stan ant le sità e ant ij castej e a vivo da artisan e ën fasend mërcà, e ambelessì as fan ij tapiss ij pì bej e 'd pì bel color dël mond. E as fan ëd travaj ëd seda ëd tùit ij color. Le pì gran sità e famose a son Còm[1], Sésar[2] e Sabastala[3], andoa ch'a l'é stait martirisà col povròm ëd San Bias[4].

E a-i é ëdcò dj'àutre ròbe dont iv conto nen. A son sota a ij tàrter dl'alvant. E tùit a-j son sot al Gran Can, imperator dij tàrter orientaj, che a-j manda dij retor. E tòst i partoma d'ambelessì e is n'andoma a l'Armenia Granda.

[1] Al temp dij clàssich a la disìo Icònio, peuj a fòrsa dë scurseje 'l nòm ij latin a j'ero rivà a dila bele che Còm, e a l'era la capital dla Turcomania (la Capadòcia dij temp clàssich).

[2] Sesaréa, che al dì d'ancheuj an turch as ciama Kaïsariyeh. An coj midem agn a në parla ëdcò l'àrab Abofelda, geògraf, dont a l'é rivane 'n test virà an latin, ch'a dis "urbs magna arboribus, et hortibus et fructibus dives, et fontibus qui eam allabuntur". Lòn ch'a va motobin d'acòrdi con j'ampression ëd bondosità 'd natura ch'a l'avìa avune March.

[3] Sempe Sìvess, e sempe në svarion ëd jë scrivan. Dzortut a l'é malfé capì com a resta che l'istessa sità a l'abio ficala ant doe provinse diferente al midem temp. Ma 'l test dël Milion a l'ha patì tante 'd cole copiature e viragi (e buté pura 'cò cost-sì ant ël cont) che gnun a l'é pa pì bon a capì da che banda dël confin ch'a la restèissa Sìvess.

[4] Che a l'era vësco pròpe dë sta Sebastè- sì (la Sìvass dël dì d'ancheuj). San Bias a l'é stàit martirisà sota a l'imperator roman dl'alvant Lissinio, dël 316, për órdin dël governator dla Capadòcia, Agrìcola.