014 - Ambelessì as conta dla provinsa d'Armenia

A l'é pro vèira che d'Armenie a-i në j'é doi, cola Cita[1] e cola Granda[2]. An cola Cita a-i é 'n rè ch'a lë sta ant na sità ch'a diso Sebastoz[3], e ch'a 'l ten bon-a giustissia e a-j ësta sota al Gran Can[4].

Ambelessì a-i é vàire sità e castej, a-i é 'd tut a la bondosa, e a-i é vàire d'osej e 'd cassa. Ambelessì a-i ëstava dla gent bon-a, ma al dì d'ancheuj a son tùit ën malora, ëd bon a l'é mach pì resta-ie ch'a son dij gran cimpador. E ch'i sapie 'cò che an brova al mar a-i é na sità ch'a diso Lajass, andoa ch'as fa dël gran mërcà, e ambelessì a-i rivo tute jë spessie ch'a ven-o da ‘nt l'alvant, e ij mërcandin ëd Venessia, ëd Genoa e dj'àutre bande as pijo ambelessì soe mërcansìe e sò drap ëd seda e coj dorà dl'Eufrà e tute j'àutre ròbe ch'a costo car.

E tùit coj ch'a veulo rintrè pì ancreus ant l'alvant a parto da sta sità-sì. E tòst iv conteroma dla Turcomania.

[1] Cola che ant sëj lìber dë stòria a diso Cilicia, a mesaneuit dla Siria.

[2] Che a truch e branca a resta cola che i disoma Armenia fin-a al dì d'ancheuj.

[3] Al dì d'ancheuj Sìvass, ant la Turchìa sentral, ch'a disìo Sìvess ai temp clàssich. Tamerlan, dël 1400, a l'ha dëmolila 'd pianta.

[4] Dël 1239 ij rè dl'Armenia Cita a l'avìo firmà n'at ëd sotomission aj tàrter, quand a l'era Can Ogadaj, e con lòn a l'avìo smonusse gran part dij sò podej.