011 - Coma che monsù March a l'é tornà dal Gran Can

E parèj, ën tornandse monsù March dal Gran Can con soa ambassada, a l'ha savuje bin conté ëd tut për lòn ch'a l'era andàit anlà, e 'd tute le maravije e dle facende grande e neuve ch'a l'avìa trovà. Ant sa manera-sì a l'é motobin piasuje al Gran Can e a tùit ij sò baron, e tùit a-j fasìo mèrit ëd gran testa e d'esse motobin dësgagià, e tùit a disìo che col temp a 'l sarìa vnùit n'òmo 'd motobin gran valor.

Rivà ch'a l'era da st'ambassada-sì, ël Gran Can a l'ha peuj ciamalo an tute j'àutre soe ambassade, e a venta ch'i sapie ch'a l'é stàit col Gran Can për bele che 17 agn. E për tut ës temp-sì a l'ha mai pì finila d'andé për ambassade për ël Gran Can, për via ch'a l'avìa fàit bin parèj la prima vira.

E lë sgnor a-j fasìa tant ëd coj onor, che j'àutri baron a n'avìo gran anghicio, e a l'é për sossì che monsù March a l'é rivà a savejne pì chiel che qualsëssìa òmo ch'a sia mai na-ie.