009 - Coma che ij doj fratej a son presentasse al Gran Can

Na vira che ij doj fratej a son rivà a la gran sità andoa ch'a-i ëstava 'l Gran Can, a son andà al Palass Magistro[1], andoa che chiel a lë stava con vàire sò baron, e a son campasse an ginojon dad'nans a chiel, visadì al Gran Can, e a son motobin umiliasse dad'nans a chiel[2].

E chiel a l'ha faje alvé sù, e a l'ha mostrasse motobin alégher, e a l'ha ciamaje chi fuss-lo mai col giovo ch'a l'avìo ansema. E monsù Nicolaj a l'ha dije "A l'é òmo vòstr[3] e mè fieul". E 'l Gran Can a l'ha dit "Ch'al sia bin venù, am pias motobin tant" e l'ha falo scrive antra ij sò parent onorà.

E për lolì tuta la cort a lo tnisìa an gran cont e tùit a 'n n'avìo na bon-a opinion. Dàit ch'a l'avìo ij papé e ij privilegi ch'a mnavo dal Papa, ël Gran Can a l'era stane motobin content, e lor a l'han daje 'cò l'euli sàcher, che chiel a l'ha arseivù con gran piasì, e a l'ha ciamaje coma fuss-ne trovasse.

E lor a l'han arsponduje "Bin, Monsù, për lòn ch'i l'oma trovave an bon-a salute e alègher". E anlora a l'é sta-ie na gran festa për soa venùa, e për vàire ch'a sio restà ant la cort a l'han avù pì d'onor che tùit ij baron.

[1] Ël palass dl'imperator a l'era stàit tirà sù dël 1256.

[2] March sossì a lo dis pa mach për ëmné la bërtavela, ma a conta d'un serimonial cinèis motobin codificà, andoa che la gent a la dovìa pròpe sté për tera dad'nans a l'imperator.

[3] "Òmo vòstr" a veul dì che as tratava d'un ch'a l'era sota al Can, al gré pì bass ëd nobiltà da sivalié, che ij tàrter a disìo "Neucheut" (da lese a la piemontèisa). Ma a vorìa 'cò dì che 'l Can as fasèissa òbligh dë vardelo, ospitelo, causselo e vistilo, fin tant ch'al restava a sò servissi. Monsù Nicolaj a dis nen tant për dì, a l'é dapress a smon-je 'n contrat al Gran Can.