Ël Milion ëd March Pòlo

La descrission dël Mond

che peuj ël pì dla la gent a la dis

Ël Milion ëd March Pòlo

Sgnor imperator, Rè e Duca e tuti j'àutri ch'i veule savejne dle diferente sòrt ëd gent e pais dël mond, lesive 's lìber-sì, andoa che iv trovereve tute le pì gran maravije e diversità 'd gent d'Armenia, ëd Persia e 'd Tarterìa, dl'Ìndia e 'd vàire àutre provinse.

E sòn ël lìber av lo conterà për órdin, conforma a coma che monsù March Pòlo, savan e nobil sitadin ëd Venessia, a jë conta ant ës lìber-sì, e a coma chiel midem a l'ha s-ciairaje. E për gionta a-i é dle ròbe ch'a l'ha nen ës-ciairà daspërchiel, ma che a l'ha sentuje da 'd gent ch'as peul deje dë ment, ma lòn ch'a l'ha vist chiel a lo dirà s-ciairà, e lòn ch'a l'han contaje a lo dirà contà, an manera che nòstr lìber a disa tut bin e sensa pa 'd busìe.

Ma mi i veuj ch'i sapie che da quand che Nosgnor a l'ha fàit Adam, nòstr prim pare, fin-a al dì d'ancheuj, nì cristian, nì sarasin ò tàrter, nì gnun òmo ëd gnun-a generassion a l'ha mai ës-ciairà nì arsërcà tante maravije dël mond coma ch'a l'ha fàit monsù March Pòlo. E a l'é pro për lòn che chiel a l'ha pensà che a sarìa tròp darmagi s'a butèissa nen për ëscrit tute le maravije ch'a l'ha s-ciairà, përchè chi ch'a jë sa nen as j'amprenda ant ës lìber-sì.

E i l'hai dë dive che chiel a l'é stàit ant coj pais për bele che 26 agn. E che peuj, na vira ch'a l'era ant la përzon ëd Genoa, a l'ha faje buté për ëscrit tute ste question-sì a monsù Rùstich ëd Pisa, ch'a l'era 'cò chiel sërà an cola midema përzon dl'ani 'd Nosgnor 1298.