N'alarme ëd motobin gran anquinament chìmich a l'é stàit lancià ant la region dë L'vov, n'Ucrain-a, andova che jer sèira a l'é amborsasse un treno e a l'ha pijait l'andi un feu ch'a l'ha brusà 15 sisterne ëd fòsfor giàon lìquid. (figure ambelessì, test an Russi). Ël sit Podrobnosti.com.ua a conta che 'l feu a l'é anandiasse quand un-a dle sisterne a l'é butasse a perdi e a contat con l'aria ël fòsfor lìquid a l'é butasse a brusé.

A smorté 's feu a l'han trovà motobin longh, përchè as peul pa dovresse d'eva, che ën tocand ël fòsfor a fa gas velenos. A l'é anda-ie ses ore anans che l'ùltima giolà as dësmortèissa. Ëd gas a l'é vnune fòra franch tutun, la surfassa anquinà al moment a ciapa 90 km. quàder. Ël cont dij ferì a l'é già motobin gròss: 20 person-e ferìe, dont 13 an condission crìtiche. As son ëstàit ëmnà a l'ospidal dë L'vov. (Film ambelessì, test an Russi)

L'area anquinà a l'ha andrinta 14 pais. Da 'nt ij 5 pì tacà al pòst ëd la disgrassia a son già stàite evacuà squasi 800 person-e, dont la mità a l'ha dovù rangesse daspërchila, ch'a-i era pa basta ëd traspòrt pùblich.

A-i é anco' nen gnun dat ansima a la diression dël vent e a ij moviment ch'as prevëddo për la nìvola ëd fòsfor. Dj'unità speciaj ëd pompista a son restà ant sël pòst për vardé ch'a taca pa torna a brusé, dëmentrè che l'aministrassion dë L'vov a sërca dë capì lòn ch'a peula anco' rive-ie ant le prime ore e pì anans ant ël temp.

Le Ferovìe Ucrain-e a l'han mandà na smentìa ufissial che la disgrassia a peula esse staita causà da dij terorista.

Podrobnosti.com.ua a arpòrta la dòse mortal ëd fòsfor giàon a 0,1 g. Conforma a la midema sorgiss d'anformassion, quand a-i part l'anvelen-ament, ël fòsfor a taca a travajé da 'nt j'òss e la miola, e fa andé an necròsi 'l fìdich.