Na masnà a l'é da bon un gran cambiament ant la vita ëd na person-a. Tut d'un colp it tache a lese mila ròbe da médich che it l'avrìe pa mai gnanca lesù an vita toa, it riesse pì nen a deurme ant na manera normal e tut lòn ch'it fase as treuva ciapà antrames a na fila d'antervaj ëd tre ore. Tre ore che peuj a son mach doe, che na vira ch'it l'has prontaje sò làit, ch'it l'has dajlo, ch'it l'has faje fé 'l reucc, ch'it l'has cogiala e ch'it l'has lavà e sterilisà 'l botin dla bagnacàuda... n'ora a l'é bele che volà.

Tut mè rispet a chi a l'ha na masnà sensa avej na famija, ò a coj che a travajo antra doj fòra ca. Mi i travajo antëcà, mia fomna a l'é an maternità, e bele parej i-i la foma pen-a pen-a. Coma diav ch'a-i la faso le fomne ch'as treuvo con un cit sensa avej na famija... misteri. E coma diav ch'a-i la fasèisso na vira, quand a travajavo an campagna tut ël dì e "maternità" a l'era na paròla dla Bibia dovrà për ciaciaré dla Madòna, e nen ëd sigura na situassion normativa... 'cò lolì, gran rispet e gran misteri.

Nen ch'asia mach na gran fadiga, për la gran carità. Mia fija a l'é dzortut simpàtica, e a la fa dij vers che un as fa bontemp mach a vardela. Ma jer... dapress a 16 ore 'd fila ch'a la piorava... iv confess ch'at ven la fantasìa dë portela a feje buté n'anterutor, për podej vischela e dësmortela. As peul nen, as capiss. A l'é viva, e nen sempe a la fa lòn ch'a veulo ij sò. Për adess as trata mach dë deurme nen deurme, pì anans le ròbe as faran pì complicà.

Comsëssìa, parlesse is parloma già. Catlin a l'ha dësvlupà 4 messagi:

• É! É! É! É! É!  (i l'hai la sgheusia)
• na ghignada ch'a la finiss ëstòrta (tir-me sù, che i l'hai chèich-còs ant slë stòmi)
• piorada curta an iiiiiiiii e lenga fòra (dame na stissa d'eva)
• piorada longa an iiiiiiaaaaaa (varda ch'i son ampinime le braje)

A l'é nen lòn ch'as ciama un gran léssich, ma për descrive jë bzògn ëd na masnà cita a travajo da pocio. Coma arzultà, për sòlit a-i la fa a comuniché ampressa, e quindi i l'oma mai j'atach istérich che a l'han tante masnà. At dis lòn ch'a la veul, ti it-j lo daghe, e mòrta-lì. Mia fomna a la riessìa nen a capì coma che i fasèissa a "andviné" che mia fija a l'avìa le braje pijn-e... La question a l'é ch'as trata pa dë tache-ie, as trata mach dë feje l'orija e associé le ròbe. A la fin dle fin as trata peuj mach d'amprende na lenga. Cola ëd toa fija. Për sòlit sossì as ven coma istint dla mari, ma a la fin dle fin as trata mach d'anandiesse a parlesse antra grand e cit da sùbit.

Soe ghignade a son nen detà da che chila a la sia contenta, a l'é ch'a la stòrs la boca. Dle vire a la ghigna già da bon, quand it-j fase gatign, ma a doi mèis d'età a ghigno anco' nen vàire, quand a lo fa a l'é dzortut na ròba ëd digestion. Soa contentëssa për sòlit as ës-ciàira da che a la slarga ij brass, a deurb le man e a jë bogia dadsà e dadlà. Quand a l'é anrabià a la scross 'me na pòrta veja e a la ven bianca 'me na strass.

Anrabiesse për adess as anrabia mach con la dotorëssa ch'a ven a feje fé ginàstica e a mostreje a noé. A la sopòrta nen. Mach ch'a-j senta la vos e a la taca a crijé. Pa ch'a-j fasa mal, che quand ginàstica i-j la foma fé mi ò mia fomna an varda tuta contenta, e con mi a la noa 20 minute ant la vasca da bagn sensa gnun problema. A l'é chila-lì ch'a-j pias nen.  Miraco ch'a sia për via che chila-lì a la gira dzorsota coma un pachet postal, che për chila a l'é mach la masnà nùmer 15 dë massagé. Ò miraco a-j pias nen la vos, che a l'é na fomna, coma dì... sbrigativa.

Però, për tant che ij prim dì a sent-la crijé coma s'a la massèisso at fasa pro vnì na frisa 'd dùbit, noé a l'ha mach faje un gran bin. Anans ch'is ancaminèisso a fé ginàstica a l'avìa sempe sò canapiòt ëstop, a la respirava mal e për consegoensa soèns a la riessìa nen pijé seugn. Adess a la respira sensa problema. A l'é bele che 5 chilo, e dl'ùltim mèis a l'é chersùa d'8 centim. A l'ha mai avù la pluria, a l'é nàita coj cavej vèir, che a son già longh bele che 12 centim...

Chèich vira, coma jer, as buta a fé ij caprissi tut ël dì, ma ansoma... a l'é cita. Mej ch'a jë fasa adess che nen quand a l'avrà 30 ani :)