Nò, i sono nen sì a sëccheve la glòria con mia fija :) Ancheuj la question a l'é n'àutra. As trata ëd nòstr tràfich. Chi ch'a l'ha pijait an man në strument për soné a sa pro lòn ch'a son le cròte. A l'é col pòst andoa na cita banda ëd malavi ës buta a soné an mala manera ën sognand dë vnì Mick Jagger. A lo ven-o nen, e a l'é già na grassia s'a-i la fan a soné ant na birerìa dontre vire anans dë chitela-lì. Për vàire temp ël piemontèis a l'é stàit an cròta.

Ma ancheuj iv dirìa che da 'nt le cròte i soma sortì fòra.

Codì ch'i diso na ròba parej? Ma, për via dij nùmer ch'i soma dapress a fé. I soma pen-a a la fin ëd Gené e i l'han già dane la blëssa ëd 114.000 e subia colp (lòn che an anglèis as ciama Hit). Për deje 'n colp a chèich-còs a venta ch'a piasa, la curiosità a fa tant, ma a-i në j'é pa 'sé për fé tant volum parej.

E gnanca a spiega nen codì che la claviera a la ven-a tirà giù sempe pì 'd soèns. I soma partì da un-a minca tre dì, adess i soma a un-a minca 1,25 dì, sensa flession. Ël rapòrt antra nojàutri ch'i stoma a lë strangé e ij resident an Piemont a l'é d'1/13 a favor dij piemontèis. A l'é ambelelì ch'a sta rivand, pa a lë strangé.

E dzortut a spiega nen codì che ant lë scartari ëd na fija turinèisa ëd 25 agn ancheuj a peula esse normal buté n'anliura ch'a manda ambelessì dafianch a cola ch'a manda dai Subsonica ò da Luttazzi. Vardé ambelessì.

Na vira un ch'a fasìa na ròba parej a sarìa stàit bele che në s-ciopà. Ancheuj a l'é normal.E a marca na gran atension dël pùblich për tut lòn ch'a l'é an piemontèis, che nojàutri i l'oma pa fasse reclam. Për trovene nojàutri un ò ch'a l'ha sërcane, ò che cheidun a l'ha dijlo...

A l'é ora ch'is rendo cont che la generassion ëd coj ch'a l'han antra 30 e 45 agn a l'é stàita l'ùltima ondà dël fassism, e che però a son sorpassà, tant coma stil ëd vita che pròpe coma sistema ëd valor. Për ij giovo d'adess ël mur a-i é pì nen. Na lenga a l'é na lenga, e mòrta-lì.

La demonisassion a l'é finìa.

A mi am pias sté coj pé bin piantà për tera, ma se ij nùmer a son nùmer... antra dontre agn che tuta ësta smens a taca a buté... i në s-ciaireroma pro dle bele :)