Mah... i chërdo che lolì a sia bele che inevitàbil, ma che as debia fesse na distinsion antra confin aministrativ (ciamom-je nen "polìtich", ch'a l' giumaj na bruta paròla) e lenghìstich. Cole entità ch'a vniran fòra a saran dzortut basà ansima a confin aministrativ e econòmich, ch'a l'é malfé ch'as treuvo nen a smon-e torna ij midem problema dle "patrie veje".

Però che an Euròpa a debia për fòrsa vnì-ie fòra un chèich-còs ch'a sia pì davsin a la gent che nen Bruxelles, lòn am ësmija bele che obligà. E peuj a l'é la stòria d'Euròpa, e la stòria as arpet sempe. Përchè an Euròpa a-i sia l'Imperi (visadì ch'a sia unìa) le nassion a l'han d'andé a tòch. Dësnò a tòch a va l'imperi... pa da feje. A l'é sempe andàita parej, da che mond a l'é mond. Ch'a-i ven-o fòra le "patrie cite" (che peuj a sconda 'd chi ch'a parla a jë ciameran "region", "aree", "fèudi" ò lòn ch'as veul) am ësmija un destin che chi ch'a-j va contra pì che dij gran paton da la stòria a peul nen ciapesse.

L'ùltima transéa a l'é che 'l vot a resta basà ansima a ij drit ëd sangh, visadì ch'it peule elege mach un con toa midema sitadinansa. Ma sòn... la sentensa Bosman na vira ò l'àutra a sarà mnà an tribunal nen mach për chi ch'a gieuga al balon, ma 'cò për ij polìtich. A-j va contra a tute ij tratà europengh che un piemontèis a peula nen fé 'l polìtich (për dì) an Fransa... e na vira ch'as riva a tochè lolì, le nassion a son bele mòrte e as va anvers a formé n'opinion pùblica europenga.

A sponsorisé na ròba parej a saran 'd sigura nen le patrie cite, ma pitòst cola gròssa andustria europenga ch'a-j fa pì còmod parlé con dontre partì an tut l'imperi, che nen dovej deje da mangé a trantamila partì e partitin daspërtut. Parlom-se ciàir, as fa motobin pì ampressa a tnisse bon tre segretari europengh, che nen com a-i riva al dì d'ancheuj. E dël midem temp, ancheuj esse segretari d'un partì "nassional" a veul dì esse gnun. Un partì "europengh" at da dle buste motobin pì gròsse (ross ò nèir che un a sia). 'Cò sossì am ësmija tròp matemàtich përchè cheidun a peula fërmelo.

A l'é mach question che la generassion ëd coj ch'a l'han 60 e subia agn a la fasa sò cors (për carità, augurand-je a tuti dë vive mila ani). Lor a son j'ùltim ch'a son tròp vej për cambié e ch'a fan e a faran arzistensa contra a ste question. Ma passa-ie lor... j'àutri a faran lòn ch'a-j conven a soe sacòce, com a l'é sempe fasse.

Për lòn ch'a toca le solussion... am fa piasì ch'i soma diferent. Col dì ch'i sio tuti midem a veul dì che fantasìa a l'é mòrta :) Però am farìa piasì savej lòn ch'at ësmija pì giust a ti. Definì na solussion a l'é 'n process. Tuti a diso la sua, e peuj as sërca na quadra :)