Freecol

Mersì a Borichèt, un dj'aministrator dla wikipedia piemontèisa, i l'oma già ël prinsipi dël manual ëd Freecol virà an piemontèis. A peul dëscariess-lo ambelessì sota, an forma PDF. A-i sarìa dë manca 'd volontari për dé na man a manten-e la version piemontèisa e për finì ij manuaj, s'a veul giuté ch'aj ëscriva a la redassion. Për vëdde tuti j'artìcoj ansima al gieugh, ch'a-i daga 'n colp col rat ansima al nòm ëd la categorìa.

La neuva dla version an piemontèis d'un videogieugh a l'é sortìa ansima a wikinews an italian, anglèis e tedësch, e a në parlo fin-a ant le liste técniche ëd Yahoo. Parej a resta malfé capì se le 45 person-e ch'a son passà a lese la pàgina d'antrodussion dël sìrcol ant ij prim 3 dì a sio dij bogianen ò mach dij forest curios, ma ëd forest a l'han dë essëjne vàire, a vardé le vire che 'l test a l'é passà ant ij programa ëd viragi aotomàtich ëd la Ragnà (con che ésit pràtich a l'é belfé anmaginesslo).

Com a-i riva con tuti ij travaj dël mond, ëdcò ël viragi ëd FreeCol a l'ha soe beghe. Ambelessì is tenoma la lista, che parej për mi a l'é belfé visemne e buteje a pòst për la version ch'a-i ven. S'i l'eve chèich-còs da gionté, për piasì feje un coment a st'artìcol-sì, parej mi im lo treuvo e im lo gionto a mia lista.

Betawiki a l’é `l sit andova ch’as fa la pì part dël viragi dël programa mediawiki (col dla wikipedia). A l’é nà dzortut për gestì ël programa mediawiki, ma ant j’ùltim temp an vàire a lo vëddo coma na bon-a arsorsa për dj’àotri proget a Sorgiss Duvèrta. A la fin dle fin sòn a l’ha mnà a gestì ant sël midem sit ëdcò la localisassion d’un clon a gràtis dël gieugh Colonization ciamà Freecol.